Иргэний нисэхийн ерөнхий газрын “Цагийн хуваарийн зөвлөл” хуралдаж, 2025 оны зуны улирлын олон улсын болон орон нутгийн хуваарьт нислэгийн цагийн хуваарийг баталлаа. Хурлаар гадаад болон дотоодын агаарын тээвэрлэгчдээс ирүүлсэн нислэгийн хүсэлтийг хэлэлцэн, зуны улирлын хуваарьт нислэгийн цагийн хуваарийг 2025 оны 3 дугаар сарын 30-ны өдрөөс 2025 оны 10 дугаар сарын 25-ны өдөр хүртэлх хугацаанд баталсан байна. Зуны улирлын хугацаанд олон улсын нислэгт нийт 17 агаарын тээвэрлэгчийн 10116 2025 нислэг төлөвлөсөн нь 2019 онтой харьцуулахад 100.9 хувиар, 2024 онтой харьцуулахад 8.9 хувиар өссөн байна. 2025 оны зуны улиралд шинээр Хо Ши Минь, Ордос болон Муан чиглэлүүдийн нислэг нэмэгджээ. Түүнчлэн орон нутгийн хуваарьт нислэгт “МИАТ” ТӨХК 6 чиглэлд 764 нислэг үйлдэхээр төлөвлөсөн байна.
“Агаарын харилцааны тухай Монгол Улсын Засгийн газар, Кувейт Улсын Засгийн газар хоорондын хэлэлцээр”-т Монгол Улсын Засгийн газрыг төлөөлж, Зам, тээврийн яамны Төрийн нарийн бичгийн дарга С.Батболд, Кувейт Улсын Засгийн газрыг төлөөлж, тус улсын Иргэний нисэхийн Ерөнхийлөгч Шейх Хумоуд Мубарак Аль-Жабер Аль-Сабах нар энэ сарын 19-ний өдөр Эль-Кувейт хотноо гарын үсэг зурлаа. Энэ онд Монгол, Кувейтийн хооронд дипломат харилцаа тогтоосны 50 жилийн ой тохиож буй бөгөөд Агаарын харилцааны хэлэлцээр байгуулснаар Монгол, Кувейтийн хооронд шууд нислэг үйлдэх эрх зүйн орчин бүрдэж байгаа юм. Хэлэлцээрийн хүрээнд хоёр улсын агаарын тээвэрлэгчид шууд болон коммерын нислэг үйлдэх боломжийг бүрдүүлэх агаад Монгол Улсын хувьд цаашид Булангийн орнууд төдийгүй Европын орнууд руу шинээр нээх нислэгийн завсрын цэг болгон ашиглах, мөн зорчигч урсгалыг нэмэгдүүлэх, аялал жуулчлалыг дэмжих, хоёр улсын хооронд худалдаа, эдийн засгийн эргэлтийг ихэсгэх, тэр дундаа Монгол Улсаас Кувейт Улс руу хийж буй махны экспортын логистикийн асуудлыг хөнгөвчлөх, экспортыг илүү тогтмол болгох эдийн засгийн чухал ач холбогдолтой. Хэлэлцээрт гарын үсэг зурсны дараа Төрийн нарийн бичгийн дарга С.Батболд Кувейт Улсын Иргэний нисэхийн Ерөнхийлөгч Шейх Хумоуд Мубарак Аль-Жабер Аль-Сабах нар албан ёсны хоёр талын уулзалт хийлээ. Төрийн нарийн бичгийн дарга С.Батболд Зам, тээврийн салбар эдийн засаг, худалдаа, аялал жуулчлал, соёл боловсрол зэрэг бүхий л салбарын хамтын ажиллагааг өргөжүүлэн хөгжүүлэх үндэс, суурь болж байдгийг тэмдэглэж, ойрын хугацаанд хоёр улсын хооронд шууд нислэг үйлдэж эхлэх сонирхолтой байгаагаа илэрхийллээ. Иргэний нисэхийн Ерөнхийлөгч Шейх Хумоуд Мубарак Аль-Жабер Аль-Сабах хоёр улсын хооронд шууд нислэг үйлдэж эхлэх асуудлыг дэмжиж байгаагаа илэрхийлж, Кувейт Эйрвэйс болон Аль-Жазийра агаарын тээврийн компанитай энэ асуудлаар шуурхай уулзалт хийж, ойрын хугацаанд боломжийг судалж, хариу мэдэгдэхээр боллоо. Мөн хоёр улсын бүх төрлийн паспорт эзэмшигчдийг харилцан визийн шаардлагаас чөлөөлөх тухай хоёр улсын Засгийн газар хоорондын хэлэлцээрийг байгуулах асуудлаар кувейтийн талын холбогдох байгууллагатай нягт холбоотой ажиллаж байгаагаа мэдэгдлээ.
Монгол Улсын Зам, тээврийн сайдын тушаалаар ИНЕГ-ын даргын албан үүргийг түр орлон гүйцэтгэгчээр томилогдсон Э.Төрбаяр өнөөдөр тамгаа гардаж, ажлаа хүлээн авлаа. Харин түүний өмнө ИНЕГ-ын даргаар ажиллаж байсан Ч.Мөнхтуяагийн ЗТХЯ-ны Төрийн нарийн бичгийн даргатай байгуулсан “Төрийн албан хаагчийг сэлгэн ажиллуулах” гэрээний хугацаа дуусгавар болсон тул ИНЕГ-ын даргын үүрэгт ажлаас чөлөөлж, урьд эрхэлж байсан албан тушаалд нь үргэлжлүүлэн ажиллуулахаар болсон байна. ИНЕГ-ын дарга Э.Төрбаяр тамгаа гардаж аваад хэлсэн үгэндээ, ИНЕГ-ын чиг үүрэг нь төрийн хяналт шалгалтын тухай хууль болоод иргэний нисэхийн тухай хууль, бусад хуулиудын хүрээнд нисэхийн аюулгүй байдал, аюулгүй хамгаалалтын хяналт зохицуулалтыг бүрэн хангахад чиглэгдэх тул мэргэжлийн өндөр ур чадвар, зохион байгуулалт, ажлын өндөр бүтээмж шаардагдана гэдгийг онцоллоо. Мөн тэрбээр ИНҮТ-ийн даргаар томилогдон ажиллах хугацаандаа шинэчлэгдсэн хуулийн дагуу бүх бичиг баримт, бүтэц, орон тооны чиг үүрэг, үйл ажиллагааны заавар журмыг боловсруулах ажилд онцгойлон анхаарч ажилласнаа дурдаад хуучин дүрмээр чиг үүрэг болгон дээрээ хэвтээ тогтолцоогоор гэрчилгээждэг байсныг ИНҮТ дээр гэрчилгээжүүлж чадсан амаргүй бөгөөд томоохон ажилд маш сайн дэмжиж ажиллаж байсан ИНЕГ-ын дарга, Даргын зөвлөлийн гишүүдэд талархал илэрхийллээ. Сүүлийн 2 жилийн хугацаанд орлогоо нэмэгдүүлэх, хуримтлагдсан авлагаа барагдуулах, хөрөнгө оруулалтыг нэмэгдүүлэх чиглэлд ихээхэн анхаарч ажилласан гэдгийг ИНЕГ-ын дарга асан Ч.Мөнхтуяа ажлаа хүлээлгэн өгөхдөө онцоллоо. 2024 оны 6 дугаар сараас агаарын навигацийн хураамж тооцох аргачлалыг шинэчилсэн, мөн нислэгийн тоо нэмэгдсэн зэрэг хүчин зүйлээс хамаарч орлого нэмэгдэн улсын төсөвт төвлөрүүлэх мөнгөө бүрэн төвлөрүүлж, олон улсын дүрмийн дагуу байвал зохих мөнгөн үлдэгдлээ бүрдүүлэн амжилттай ажилласан байна.ИНЕГ-ын 2024 онд Гүйцэтгэлийн төлөвлөгөөнд 19 зорилтын хүрээнд 130 арга хэмжээг хэрэгжүүлэхээр тусгаснаас урьдчилсан байдлаар 91.3 хувийн хэрэгжилттэй байгаа. 2025 онд Гүйцэтгэлийн төлөвлөгөөнд 18 зорилтын хүрээнд 147 арга хэмжээг хэрэгжүүлэхээр тусган Зам, тээврийн сайдаар 2025 оны 01 дүгээр сарын 06-ны өдөр батлуулсан байна. ИНЕГ-ын 2025 оны төсвийг батлуулах, ажилтнуудын цалин хөлсний эрх зүйн тогтолцоог бүрдүүлэх, батлагдсан төсвийн дагуу цалин хөлсийг 2025 оны 01 дүгээр сарын 01-ний өдрөөс 6 хувиар нэмэгдүүлэх, Иргэний нисэхийн 57 дүрмийн төслийг Зам, тээврийн сайдаар батлуулж, мөрдөж ажиллах, АНУ-руу хийх шууд нислэгийн бэлтгэл ажлыг эрчимжүүлэх ажлын хэсгийг Зам, тээврийн сайдаар шинэчлэн батлуулж, хэрэгжилтийг ханган ажиллах, үйл ажиллагаандаа олон улсын чанарын менежментийн тогтолцоог нэвтрүүлж, гэрчилгээжих гэх мэт томоохон ажлуудыг төлөвлөн ажиллаж байна.Иргэний нисэхийн тухай хууль 2025 оны 01 дүгээр сарын 01-ний өдрөөс хүчин төгөлдөр мөрдөж эхлэхтэй холбогдуулан Зам тээврийн сайдын баталсан тушаалаар ИНЕГ-ын зохион байгуулалтын бүтэц, үйл ажиллагааны стратеги, бүтцийн өөрчлөлтийн хөтөлбөрийг шинэчлэн баталснаар 8 газар, 6 хэлтэстэйгээр үйл ажиллагаа явуулж байна. Засгийн газрын 2016 оны 4 дүгээр тогтоолоор батлагдсан ИНЕГ-ын 106 орон тоонд 95 ажилтан, үүнээс иргэний нисэхийн хяналтын байцаагч 45 ажилтан байна.
Улиран одож буй 2024 онд Газрын тусгай үйлчилгээ, шатахуун хангалтын албаны хамт олны хувьд ажлын амжилтаар дүүрэн байж өмнө тавьсан зорилтоо амжилттай биелүүлсэн байна.Шинэ оны босгон дээр тус албаны нэр бүхий ажилтнуудын хөдөлмөр зүтгэлийг Монголын төр өндрөөр үнэлж төрийн дээд одон медаль болон салбарын шагналаар шагнажээ. Тухайлбал эрхэлсэн ажилдаа амжилт гаргасан Газрын тусгай үйлчилгээ, шатахуун хангалтын албаны Техник үйлчилгээ, засварын хэсгийн дарга Г.Сосорбарам, Захиргаа, хүний нөөцийн хэсгийн дарга Ц.Цэрмаа, Тээвэр удирдлагын хэсгийн нийтийн тээврийн жолооч Ш.Энхбат нарыг Төрийн дээд шагнал “Алтан гадас одон”-оор, Ерөнхий инженер Б.Гантулга, Технологи, газрын үйлчилгээний хэсгийн дарга С.Буяндэлгэрэх, Шатахуун хангалтын хэсгийн дарга Б.Цэрэнбат нарыг “Хөдөлмөрийн хүндэт медалиар, Тээвэр удирдлагын хэсгийн нийтийн тээврийн жолооч Б.Алтангэрэлийг Зам, тээврийн яамны “Онц тээвэрчин” хүндэт тэмдгээр, Техник үйлчилгээ, засварын хэсгийн техникийн тоо бүртгэлийн мэргэжилтэн Х.Саяхатыг ИНЕГ-ын Жуух бичгээр, Тээвэр удирдлагын хэсгийн нийтийн тээврийн жолооч Н.Энхсайханыг ИНЕГ-ын Баярын бичгээр тус тус шагнагдлаа. Шагнал хүртсэн тус албаны нийт ажилтнуудад халуун баяр хүргэж, ажлын улам их амжилт хүсэн ерөөе.
Ирэх онд тохиох Монгол Улсад нисэх хүчин үүсэж хөгжсөний 100 жилийн ойг угтан Дорнод аймаг дахь “Чойбалсан” олон улсын нисэх буудлын хамт олон хэт холын гүйлт зохион байгуулахаар төлөвлөжээ. Тус нисэх буудлын хамгаалалтын ажилтан, талбайн зохицуулагч Мөнхбатын Хоролжав хамт олноо төлөөлөн Дорнод-Улаанбаатар чиглэлд олон өдрийн хэт холын зайд гүйхээр болжээ. Төлөвлөсөн ёсоор М.Хоролжав “Чойбалсан” олон улсын нисэх буудлаасаа гараад Сүхбаатар аймгийн “Баруун-Урт” нисэх буудал - Хэнтий аймгийн “Өндөрхаан” нисэх буудал - “Буянт-Ухаа” олон улсын нисэх буудал гэсэн маршрутаар 813 км зайд гүйх юм. Тэрбээр он гараад бэлтгэл сургуулилтаа эхлэх бөгөөд гүйлтээ 2025 оны дөрөвдүгээр сарын 25-ны өдөр эхэлж, нисэх хүчний ойн баярын өдөр буюу тавдугаар сарын 25-ны өдөр барианд орохоор төлөвлөсөн байна. “Иргэдэд нийтийн биеийн тамир, спортын идэвхитэй хөдөлгөөний ач холбогдол, амьдралын зөв дадал хэвшлийг биеэр үлгэрлэн, салбарын үйл ажиллагааг олон нийтэд сурталчлан таниулахад энэхүү гүйлтийн эрхэм зорилго оршиж байгаа гэдгийг хэт холын зайн гүйгч М.Хоролжав онцоллоо. Гүйлтийн үеэр тухайн нисэх буудлуудын алдар гавьяатай хүмүүсийг үе шаттайгаар цувралаар оролцуулан контентууд бэлтгэн олон нийтэд хүргэнэ. Иймд орон нутгийн нисэх буудлууд тус арга хэмжээнд идэвхитэй оролцож, дэмжиж ажиллахыг “Чойбалсан” нисэх буудлын дарга С.Батхүү уриаллаа.
Монгол Улсаас АНУ-ын хооронд шууд нислэг үйлдэх бэлтгэл ажлын хүрээнд “МИАТ” ТӨХК-ийн Агаарын хөлгийн засвар үйлчилгээний газар АНУ-ын Иргэний нисэхийн ерөнхий газар “FAA” FAR-145 дүрмийн дагуу аудит шалгалтад амжилттай шалгуулж, тэнцлээ. АНУ-ын нислэгийн аюулгүй ажиллагаа, техникийн үйл ажиллагааны чанар, стандартыг бүрэн хангасан агаарын тээвэрлэгч болсноор “МИАТ” ТӨХК-ийн үйл ажиллагааны цар хүрээ тэлж, АНУ-ын зах зээлд гарах, тус улсад бүртгэлтэй агаарын хөлгүүдэд засвар үйлчилгээ үзүүлэх бүрэн боломжтой болж буй юм.
Монголын тээвэр холбоо, газрын тосны ажилтны үйлдвэрчний эвлэлүүдийн холбооноос зохион байгуулсан “Эв нэгдэл” шилжин явах цомын төлөөх спортын 4 төрөлт тэмцээнд иргэний нисэхийн баг тэргүүн байр эзэлж, “Шилжин явах цом”-ын эзэн боллоо. Тус тэмцээний шатрын төрөлд НХНАА-ны холбооны инженер У.Гэрэлт мөнгөн медаль хүртсэн бол ширээний теннисний төрөлд МТХ-ийн инженер Д.Ган-Өлзий мөнгөн медаль, НХНАА-ний холбооны инженер Т.Оюунтуул алтан медаль хүртлээ. Дартсын төрөлд ЗХАГ-ын ажилтан М.Цэндсүрэн, МТХ-ийн сүлжээний ахлах инженер Э.Батболд, инженер Т.Гантулга, мэдээллийн технологийн инженер Б.Буянхүү, НУТА-ны нислэгийн бүртгэл гүйцэтгэлийн оператор С.Энхзул нар багаараа алтан медаль хүртжээ. Сагсан бөмбөгийн төрөлд эрэгтэйчүүдээс НХНАА-ны холбооны инженер Ш.Энх-Оргил, ГТҮШХА-ны жолооч Д.Давааням, НСЦ-ын ахлах мэргэжилтэн Э.Тэмүүлэн, биеийн тамирын арга зүйч мэргэжилтэн О.Жамуха, Т.Наранбат, НАБХА-ны ажилтан С.Батболд, Г.Өлзийбаяр, АГСА-ны ажилтан Б.Ууганбаатар нарын бүрэлдэхүүнтэй баг мөнгөн медаль, “Буянт-Ухаа” ОУНБ-ын мэргэжилтэн Д.Ариунзаяа, ИНЕГ-ын Улсын байцаагч Я.Нансалмаа, НАБХА-ны үзлэгийн шалгагч Г.Сайнзаяа, ГТҮШХА-ны мэргэжилтэн Д.Мөнхцэцэг, тээвэр зохицуулагч С.Булган, ИНҮТ-ийн мэргэжилтэн О.Болортуяа, Дулаан сангийн инженер С.Ившин, Г.Доржханд нарын бүрэлдэхүүнтэй эмэгтэй баг алтан медаль хүртсэн байна. Ингээд нийлбэр дүнгээр НСЦ-ын ахлах мэргэжилтэн Э.Тэмүүлэн ахлагчтай иргэний нисэхийн баг 1-р байр эзлэн “Шилжин явах цом”-ын эзэн боллоо. Мөн эмэгтэй сагсан бөмбөгийн шилдэг тоглогчоор ГТҮШХА-ны тээвэр зохицуулагч С.Булган шалгарсан бол ГТҮШХА-ны ҮЭХ-ны дарга Н.Даариймаа Гэр бүл, хөдөлмөр, нийгмийн хамгааллын яамны Тэргүүний ажилтан цол тэмдгээр шагнуулжээ.
ИНЕГ-ын Гадаад хамтын ажиллагааны хэлтсийн Олон улсын байгууллага хариуцсан мэргэжилтний ажлын байранд сонгон шалгаруулалтад урьж байна.
“Амьдралын төлөөх аавууд” аян, хөдөлгөөнөөс ИНЕГ-ын ажилтнуудад аавын хүмүүжлийн арга барилын талаар мэдээлэл өглөө.Сүүлийн үед нийгэм, эдийн засгийн байдлаас шалтгаалан гэр бүл салалт ихэссэн бөгөөд аавгүйдлийн улмаас үүсдэг нөлөөллийн талаар тус байгууллагаас судалгаа хийсэн байна. Тухайлбал, Аавгүй өссөн хүүхдүүд сэтгэл хөдлөл болон зан авирын асуудал ихээр гаргадаг ба хөвгүүдийн хувьд ажилгүйдэл, гэмт хэрэгт холбогдох нь их байдаг байна. Судалгаагаар удаан хугацаагаар хоригдох ял авсан өсвөр үеийнхний 70 хувь нь аавгүй өссөн байдаг байна. Мөн аавгүй хүүхдүүдийн дунд сургуулиас завсардах байдал 2 дахин их байдаг, аавгүй өссөн охидуудын хувьд 3 дахин их ганц бие ээж болдог судалгаа гарчээ. “Хүүхэд дуугаа хураагаад, ярилцахаа болих нь олон хүчин зүйл нөлөөлж болно. Харин энэ нь удаан хугацаагаар үргэлжлэх нь амьдралд нь сөргөөр нөлөөлж болох юм. Тиймээс аав хүнийхээ хувьд тэдний хийх дуртай зүйлд нь оролцож, бага багаар харилцах боломжийг эрэлхийлэх хэрэгтэй. Хамтдаа ярилцах нь бүх асуудлын шийдэл болохгүй ч сэтгэлээ тайвшруулах боломжтой болдог гэдгийг хүүхэд тань ойлгох юм. Амьдралын төлөөх аавууд та бол хүүхдийнхээ хамгийн сайн харилцагч байх боломжтой юм” гэдгийг Амьдралын төлөөх аавууд аян, хөдөлгөөний зохицуулагч, ICAN олон улсын аавуудын сургалтын мастер багш Ч.Гансүх мэдээлэлдээ онцоллоо. “Бидэнд байгаа үнэ цэнтэй цаг бол хайртай хүмүүстэйгээ хэр их цаг гаргахаас шалтгаалдаг. Бидний ажиллаж, хөдөлмөрлөж байгаа цагууд үнэндээ гэр бүлийнхээ хүмүүсийг аз жаргалтай болгохыг хичээж байгаагаас үүдэлтэй. Гэвч заримдаа энэ их хичээл зүтгэлдээ хэт автаад хамтдаа цагийг өнгөрөөхөө умартдаг. Аавтайгаа хамт байх хугацаа дэндүү бага байсан гэдгээ бид яг аавынхаа насанд ирэх үедээ анзаардаг. Өнөөдөр хүүхэддээ цаг гаргах хамгийн тохиромжтой цаг гэдгийг өнөөдөр л бид өөртөө сануулах хэрэгтэй. Аавын гаргасан сайхан цаг, тэр хором мөч бүхэн биднийг аз жаргалтай болгож байсныг бид ойлгодог. Тэгвэл бид хүүхдүүддээ хэзээ хамгийн сүүлд дурсамж үлдээхээр гайхалтай цагийг гаргасан бэ? Өнөөдөр, одоо л тэр цагийг бид гаргаж чадна. Хүүхдүүд маань бидэнд цаг гаргаасай гэж хэлээгүй ч сэтгэлдээ цаг гаргаасай гэж хүлээж байгаа гэдгийг мөн тэрбээр аавуудад санууллаа.